Zuccarello mistar viktig lagkamerat
Den sveitsiske vingen Kevin Fiala blir bytt bort frå Mats Zuccarellos Minnesota Wild til Los Angeles Kings. Fiala var ein av Wilds fremste spelarar sist sesong.
Avtalen mellom klubbane vart stadfesta natt til torsdag.
Det har lenge versert rykte om at Wild måtte kvitte seg med Fiala, som sist sesong noterte seg for karrierebeste i NHL med 85 poeng i grunnserien. Han skåra 33 mål og fekk 52 målgivande pasningar. 25-åringen var dessutan éin av to Wild-spelarar som spelte alle 82 kampane i grunnserien.
I sluttspelet vart det exit i 1. runde med 2-4-tap for divisjonsrival St. Louis Blues.
Fiala var på utgåande kontrakt og ville truleg uansett ha forlate Wild gratis. Wild-leiar Bill Guerin har lenge vore open om at klubben ikkje kan gi Fiala ny kontrakt som følgje av ein trong økonomisk situasjon.
– Kevin har hatt eitt flott år, men vi var berre ikkje i stand til å gi han ny kontrakt. Vi visste det og Kings visste det. Det var ingen vits i å prøve å gi han ein dårleg kontrakt, sa Guerin då avtalen vart stadfesta.
I byte for Fiala får Wild den 19 år gamle backen Brock Faber og eit val i 1. runde av årets draft.
– Han er eit verkeleg stort talent, sa Guerin om Faber.
(©NPK)
Kevin Fiala blir bytta bort frå Mats Zuccarellos Minnesota Wild. Foto: Matt Slocum, File / AP / NTB
