Amazon opnar kasselaus matbutikk
Måndag opnar netthandelgiganten Amazon ein daglegvarebutikk i Seattle i USA som automatisk registrerer alle varer kundane tar med seg.
Butikken, som ligg i første etasje i hovudkvarter til selskapet i byen, har lenge vore på teststadiet. Opphavleg var planen å opne den i byrjinga av 2017, men finjusteringa av teknologien har tatt lengre tid enn venta.
Butikken kombinerer kamerateknologi, maskinlæring og sensorar som registrerer kva folk plukkar med seg. Betalinga blir trekt automatisk frå Amazon-kontoen til kundane når dei forlèt butikken. Dermed slepp kundane all form for kø ved kassa og kan gå rett ut av butikken når dei er ferdige å handle. Dersom varer blir sette tilbake i hyllene, blir det registrert, og ein slepp å betale.
Butikken sel ferdigmat, snacks og enkelte daglegvarer som brød, mjølk, ost og sjokolade. I første omgang er teknologien berre i bruk i denne eine butikken.
Sjølv om Amazon i hovudsak driv med netthandel, eig dei stadig fleire fysiske butikkar - spesielt etter oppkjøpet av den økologiske daglegvarekjeda Whole Foods' 470 butikkar i fjor. Selskapet driv også fleire bokhandlar.
(©NPK)
Arkivbilde av butikken frå april i fjor. Etter over eitt år med testar, er den klar for opning. Foto: Elaine Thompson / AP / NTB scanpix.
