Fleire oppsøkjer incestsentera
Nesten 3.500 kvinner og drygt 1.000 menn oppsøkte dei 22 sentera mot incest og seksuelle overgrep i fjor. Det er ein auke på 14 prosent.
I alt var det 33.574 brukar som oppsøkte incestsentera, viser Barne-, ungdoms- og familiedirektoratets (Bufdir) årlege statistikk.
- Det er positivt at fleire nyttar sentera, seier Bufdir-direktør Mari Trommald, som viser til at sentera over fleire år har jobba aktivt med å promotere tilboda og eksistensen sin.
- Vi håpar at denne synleggjeringa av tilbodet, og auka openheit i samfunnet rundt seksuelle overgrep, fører til at fleire ynskjer å nytte tilbodet, seier Trommald i ei pressemelding.
Dei fleste av brukarane, nesten åtte av ti, har sjølv vore utsette for incest. Men også pårørande oppsøkjer sentera. Nesten halvparten av dei pårørande var mor til nokon som blei utsett for seksuelle overgrep.
Slike overgrep skjer oftast i nære relasjonar, opplyser Bufdir. Berre 13 prosent av offera blei utsett for overgrep frå ein ukjent person, medan kvar fjerde har blitt utsett for overgrep frå ein forelder.
Dei fleste var blitt utsett for overgrep i svært ung alder, nesten fire av ti før dei fylte sju år.
(©NPK)
22 senter over heile landet hjelper incestutsette og pårørande. Mange av brukarane var svært unge då dei blei utsett for seksuelle overgrep. Illustrasjonsfoto: Jo E. Brenden / NTB scanpix
