Gebyr til Bedriftsforbundet for innhenting av telefonlogg
Datatilsynet har gitt Bedriftsforbundet eit gebyr på 75.000 kroner for å ha brote personopplysningsloven. Det skjedde i samband med ein konflikt i leiinga.
Ifølgje VG var det tidlegare nestleiar Marit Momrak Wright som klaga forbundet og leiar Olaf Thommessen inn for Datatilsynet.
Forbundet tok kontakt med teleselskapet dei brukar og fekk utlevert ei oversikt over alle utgåande samtalar og meldingar frå telefonen til Wright. Bakgrunnen var mistanke om at ho kunne vere den som hadde gitt informasjon til VG knytt til intern uro i forbundet.
«Overtredelsen fant sted forsettlig i den forstand at selve behandlingen av personopplysningene skjedde med viten og vilje. Overtredelsen var ikke en følge av en glipp, rutinesvikt eller lignende. Bedriftsforbundet har anført at de har utvist forsett fordi de var i god tro ettersom Dipper leverte de spesifiserte fakturaene uten forbehold. Datatilsynet finner det klart at Bedriftsforbundet ikke kan bli hørt med dette», heiter det i avgjerda frå Datatilsynet.
Olaf Thommessen har ikkje ønskt å bli intervjua om gebyret, og Bedriftsforbundet viser til ei utsegn frå informasjonsansvarleg Joachim Dagenborg. Han skriv at forbundet har vedtatt gebyret, trass i at dei er ueinige i avgjerda til Datatilsynet.
(©NPK)
Olaf Thommessen er leiar i Bedriftsforbundet. Arkivfoto: Håkon Mosvold Larsen / NTB scanpix
