IAEA: Ingen teikn til at Nord-Korea har stoppa kjernefysisk aktivitet

Det er ingenting som indikerer at Nord-Korea har stoppa sin kjernefysiske aktivitet, ifølgje ein rapport frå Det internasjonale atomenergibyrået (IAEA).

Rapporten vart lagt fram tysdag. Der uttrykkjer IAEA stor bekymring for vidareutviklinga av atomprogrammet i landet.

- Fortsettinga av og den vidare utviklinga av Nord-Koreas atomprogram og utsegner frå Nord-Korea i samband med dette gir grunn til stor bekymring, skriv atomenergibyrået.

Nord-Koreas leiar Kim Jong-un har dei siste månadane hatt toppmøte med både USAs president Donald Trump og Sør-Koreas Moon Jae-in. Begge gongene lova Kim at han ville jobbe for å gjere Korea-halvøya fri for atomvåpen.

(©NPK)

Nord-Koreas leiar Kim Jong-un i eit udatert bilde frå statlege medium. Foto: AP/NTB scanpix