Kundar saksøkjer meklarhuset Nordic Securities
Måndag vart fleire tilsette i meklarhuset Nordic Securities sikta for økonomiske lovbrot. No krev 21 kundar betalt tilbake 23 millionar kroner av selskapet.
21 kundar av meklarhuset Nordic Securities har stemna sju sentrale og namngitte personar i meklarhuset og TNG, skriv Dagens Næringsliv (DN) torsdag. Kundane krev 23 millionar kroner etter kjøp av aksjar i morselskapet til meklarhuset.
- Mine klientar har tapt mykje pengar fordi dei kjøpte aksjar i TNG på anbefaling frå meklarhuset. Vi meiner sentrale personar i dei to selskapa ikkje har følgt opp reglar for å beskytte investorar og sikre at interessene til kundane blir varetatt, seier kundeadvokat, Tore Hjelseth, til avisa.
Dei saksøkte er noverande og tidlegare styremedlemmer i både Nordic Securities og TNG, i tillegg til gründerane av selskapa. Advokaten til fem av dei saksøkte, Trym Ass, seier til avisa at klientane hans tar avstand frå påstandane som er fremja, men ønskjer ikkje å kommentere saka utover dette.
Nyheita om søksmålet kjem i ei dårleg tid for meklarhuset. Måndag vart det kjent at Økokrim har gjennomført ei ransaking av lokala til meklarhuset i Oslo og Bergen. Fleire personar med tilknyting til Nordic Securities er sikta for økonomisk kriminalitet. Bakgrunnen for aksjonen var ei politimelding frå Finanstilsynet.
Meklarhuset mista lisensen til å yte investeringstenester for eit år sidan fordi dei systematisk braut vedtekter i verdipapirlova, ifølgje Finanstilsynet. Blant anna skal dei ha selt aksjar i sitt eige selskap til kundane.
(©NPK)
