Lågaste bygningsvekst på 20 år

1. januar 2018 var det registrert 4,2 millionar bygningar i Noreg, melder Statistisk sentralbyrå. Bygningsmassen auka netto med 0,6 prosent i 2017. Veksten har vore minkande sidan 2011, og er den svakaste veksten sidan starten av statistikken i 1997. Nedgangen kan kome av ei dreiing frå småhus til bustadblokker.

Endringar i bygningsmassen kjem av nybygg, riving og endra bygningsbruk. I 2017 var det 12.813 bygningar som fekk endra bygningstype. Frå 1. januar 2018 var det 47.991 nye bygningar. Omvendt var det 24.048 bygningar som ikkje lenger eksisterte ved inngangen til 2018.

Landbruksbygningar er den einaste større gruppa av bygningar som har hatt nedgang på landsbasis det siste året. Nettonedgangen var på 2.700 til 499.100 bygningar.

Små bustadbygg, fritidsbygg og garasjar står for den største delen av nettovekst i bygningsmassen, med til saman 24.300 bygningar. I alt var det registrert 3,4 millionar slike bygningar 1. januar 2018.

(©NPK)

Bygningsveksten har ikkje vore så låg sidan 1997. Illustrasjonsfoto: Berit Roald / NTB scanpix