Merkinga av ulv blir avslutta av omsyn til hjort og andre dyr
Omsynet til hjortevilt og andre dyr gjer at Miljødirektoratet avsluttar merkinga av ulv etter at til saman tolv ulvar frå tre revir har blitt merka.
Fem ulvar er radiomerket i Slettåsreviret og like mange i Letjennareviret. I Mangenreviret er det merket to ulvar, men etter planen skulle ytterlegare to ulvar vore merka her, opplyser Miljødirektoratet.
Det er feltpersonell i Statens naturoppsyn i Miljødirektoratet som har merka ulvane i vinter på oppdrag frå Klima- og miljødepartementet. Målet har vore å vurdere skadepotensialet hos ulvar som er fødde i norske revir.
Den snørike vinteren skapar derimot store problem for mange ville dyr, og spesielt for hjortevilt. Det er komme inn fleire bekymringsmeldingar i vinter, blant anna om at dyra har problem med å finne mat og at det er kraftkrevjande for dyra å bevege seg i djupsnøen.
- Vi har vurdert at aktiviteten vår no kan forstyrre hjortevilt i ein sårbar situasjon. I tillegg har vi allereie fått merka tolv ulvar. Derfor vel vi å avslutte merkinga, seier seksjonsleiar Knut Morten Vangen i Miljødirektoratet.
(©NPK)
Ein eitt år gammal ulvehann blei bedøva frå helikopter ved Ulvsjøberget ved Osen i Åmot i Hedmark i byrjinga av januar. Ulven stammar frå Slettåsflokken og blei radiomerka med GPS-sendar før den blei sleppt fri igjen. No blir radiomerkinga stoppa etter at tolv ulvar er blitt merka i vinter. Årsaka er omsynet til hjortevilt og andre dyr. Foto: Heiko Junge / NTB scanpix
