Noreg sender berre tre utøvarar til innandørs-VM: - Liten, men spennande tropp
Ezinne Okparaebo, Isabelle Pedersen og Hedda Hynne blir dei einaste norske innslaga under innandørs-VM i friidrett i mars.
- Det er ein liten, men spennande tropp, seier toppidrettssjef Håvard Tjørhom til Norges Fri-idrettsforbund.
Okparaebo (Norna-Salhus) skal springe 60 meter, mens Pedersen (BUL) skal i aksjon på 60 meter hekk. Hynne (Strindheim) spring 800 meter i Birmingham.
Amalie Iuel var kvalifisert for innandørs-VM, men sjukdom har prega oppkøyringa.
- Amalie Iuel var kvalifisert, men har slite litt med sjukdom i vinter og valde å droppe meisterskapen for å kunne førebu seg best mogleg til utandørssesongen, seier Tjørhom.
Vladimir Vukicevic mangla nokre få hundredelar på å klare VM-kravet. Fleire av dei beste norske utøvarane har ikkje prioritert innandørsmeisterskapen i år.
- Også Jonathan Quarcoo var tett på kravet, mens utøvarar som Karsten Warholm, Karoline Bjerkeli Grøvdal og brørne Ingebrigtsen ikkje la opp til deltaking i Birmingham, seier han.
Sjølv med liten VM-tropp, er Tjørhom forventningsfull.
- Ezinne har hatt ein solid innandørssesong, Isabelle viste i Torun sist veke at ho er på full fart tilbake etter å ha slite med matforgifting tidlegare i sesongen og Hedda viste klar formstiging i Torun sist veke. Eg har god tru på at desse vil levere i VM.
Innandørs-VM startar 1. mars.
(©NPK)
Ezinne Okparaebo er norsk VM-håp i Birmingham.
Foto: Vidar Ruud / NTB scanpix
