Ulsrud med prestisjetap for Sverige
Thomas Ulsrud tapte 7-9 for erkerivalen Niklas Edin i curling-EM onsdag. Dermed har dei norske gutane kniven på strupen i kampen for semifinaleplass.
Tapet i den åttande runden var det tredje tapet for Noreg, og laget held framleis tredjeplassen i det innleiande spelet saman med Skottland og Tyskland.
Edin sjokkerte dei norske spelarane med å vinne den første omgangen 4-0. Den leiinga gav aldri svenskane frå seg, sjølv om Ulsrud med Torger Nergård, Christoffer Svae og Håvard Vad Petersson på laget hadde sjansen til å knipe innpå.
Kampen vart avgjort da Sverige gjekk opp i ei trepoengsleiing med to omgangar igjen å spele. Ulsrud reduserte i den niande før han takka for kampen.
Noreg har igjen Tyskland i grunnspelet og treng truleg siger for å sikre seg ein plass i semifinalen. Skottland har igjen Nederland.
Det norske kvinnelaget med Kristin Skaslien som skip slo Estland 11-4. Dermed står det norske laget med sju sigrar og eitt tap i B-divisjonen og har kvalifisert seg for sluttspelet. Der skal det kjempast om ein opprykksplass og kvalifisering til VM.
(©NPK)
Thomas Ulsrud og co. tape 7-9 for Sverige med Niklas Edin som skip i curling-EM onsdag. Foto: Jon Eeg / NTB scanpix
