Omdiskutert VAR-straffe hindra Danmark-siger
Eit kanontreff av Christian Eriksen og ei omdiskutert VAR-straffe sørgde for 1-1 i VM-oppgjeret mellom Danmark og Australia.
Åge Hareides menn kunne langt på veg sikre avansement med siger mot Australia, men klarte berre uavgjort. No kan det hende at danskane blir avhengige av poeng mot Frankrike i siste gruppespelskamp for å gå vidare.
Christian Eriksen sørgde for at danskane fekk ein draumestart. Stadionuret viste berre seks minutt då Tottenham-spelaren hamra inn 1-0 på halvvolley etter ein leiken pasning frå Nicolai Jørgensen. Eriksen har no vore direkte involvert i 18 mål, av dei 13 scoringar og fem målgivande, på hans siste femten landskampar.
Nicolai Jørgensen burde ha dobla leiinga etter 23 minutt, men headinga frå fem meter gjekk rett utanfor.
Omdiskutert VAR-straffe
Etter 35 minutt fekk dommar Antonio Mateu beskjed på øyret om ei mogleg straffe etter ein hands frå Yussuf Poulsen. Etter å ha sett situasjonen valde dommaren å peike på straffesparkmerket og vise Poulsen det gule kortet.
TV-bilda viser at headinga frå Matthew Leckie trefte Poulsens hand, men tida og avstanden var kort. Det avgjerande var derimot at handa var i ein unaturleg posisjon ifølgje den spanske kampleiaren.
Mile Jedinak var iskald frå elleve meter og sende Kasper Schmeichel feil veg. Dermed sprakk nullen for danskanes keeperkjempe etter 571 minutt utan baklengs på landslaget.
Mållaus andre omgang
1-1 stod seg til full tid. Andre omgang var jamn og bølgja mykje fram og tilbake, men Australia pressa mest.
Aaron Mooy var svært nær ved å fullføre ein australsk snuoperasjon ved eit vanvitig langskot, men ballen gjekk rett utanfor krysset etter 70 minutt spelt.
Minuttet seinare sneik skotet til danske Pione Sisto seg rett utanfor stolperota.
Australias Andrew Nabbout måtte kaste inn handkleet dryge kvarteret før slutt med det som likna på ei skulder ut av ledd.
Gruppa ikkje avgjort
Etter dagens kamp er Australia avhengig av siger mot Peru i siste gruppespelskamp. Frankrike sikrar avansement med siger i dagens kamp mot Peru.
Danmarks meisterskapsframtid er uviss. Danskane står med fire poeng på dei to første kampane.
Gruppe C blir avslutta onsdag ettermiddag.
(©NPK)
Mile Jedinak sikra 1-1 etter ei omdiskutert VAR-straffe i første omgang. Foto: Gregorio Borgia / AP/ NTB scanpix
Christian Eriksen hamra inn ei tidleg leiing mot Australia. Foto: Martin Meissner/ AP/ NTB scanpix
Ved hjelp av videodømming peikte dommar Antonio Mateu på straffesparkmerket etter denne handsen frå Yussuf Poulsen. Foto: Martin Meissner/ AP/ NTB scanpix
