Pedersen nummer to på 1500 meter i Erfurt

Pedersen gjekk inn til 1.45,76 i nest siste par og var då i klar leiing, men russiske Denis Juskov slo tida hans med 0,43 sekund i siste per.

Det var god norsk laginnsats med Sindre Henriksen på 5.-plass med 1.46,58 og Allan Dahl Johansson på 6.-plass med 1.46,78. Håvard Bøkko blei nummer 11 med 1.47,55.

Håvard Holmefjord Lorentzen blei nummer fire på 500-meteren fredag. Pallen glapp med minste margin.

Lorentzen blei klokka inn til 35,10 og fekk same tid som Artjom Kuznetsov på tredjeplass. Nordmannen var derimot tre tusendelar bak russaren og måtte dermed ta til takke med den sure fjerdeplassen.

Jamt

Opp til russiske Pavel Kulizjnikov på toppen av resultatlistene skilte det heller ikkje meir enn sju tildeler. Andreplassen på distansen gjekk til nederlandske Michel Mulder.

Henrik Fagerli Rukke blei nest beste nordmann på 13.-plass med 35,47.

På 500 meter for kvinner blei det femteplass til Hege Bøkko. Tida 38,36 var eit drygt halvsekund svakare enn vinnaren Karolina Erbaova frå Tsjekkia.

Bøkko var i topp seks også på 1.000 meter, der ho med 1.16,29 blei nummer seks. Jorien ter Mors frå Nederland vann på 1.15,20.

Best i B-gruppa

Tidlegare på dagen i Erfurt var Simen Spieler Nilsen raskast av alle i B-gruppa på 1.500 meter.

24-åringen frå Arendal blei klokka i mål til 1.47,81. Dermed hadde han 41 hundredelar til gode på canadiske Ted-Jan Bloemen, som følgde nærmast nordmannen på resultatlista.

I B-gruppa på 500 meter blei det også norsk i toppen. Falken-løpar Bjørn Magnussen blei nummer tre etter å ha fått opp tida 35,84. Framfor seg på resultatlista hadde han nederlandske Kjeld Nuis (35,36) og australske Daniel Greig (35,62).

(©NPK)

Sverre Lunde Pedersen blei nummer to på 1.500 meter i verdscupen skøyter fredag. Foto: Carina Johansen / NTB scanpix