Spansk aktor krev Puigdemont arrestert i Danmark
Spansk påtalemakt ber ein domstol skrive ut ein ny arrestordre mot Catalonias tidlegare president Carles Puigdemont, som er på besøk i Danmark.
Puigdemont svarte ikkje på spørsmål frå dei mange journalistane som tok imot han på Kastrup-flyplassen måndag morgon.
Spania har gjort det klart at det ville bli skrive ut ein internasjonal arrestordre på Puigdemont dersom han som varsla reiste til Danmark for å delta på ein debatt ved Universitetet i København.
Den katalanske separatistleiaren vil deretter bli kravd utlevert. Måndag formiddag opplyser kjelder i rettsstellet til fleire medium at spansk påtalemakt har bedt ein domstol i Madrid om å skrive ut ein arrestordre.
Flykta
Puigdemont flykta til Belgia etter at Catalonias forsøk på lausriving slo feil og spanske styresmakter sende ut arrestordre på han og fleire andre katalanske leiarar.
Danmark-besøket er første gong Puigdemont reiser utanlands sidan han drog i eksil til Belgia.
Oppheva arrestordre
Puigdemont er skulda for oppvigleri og misbruk av offentlege middel i Spania etter at regjeringa hans arrangerte ei folkeavstemming om sjølvstende i fjor.
Ein europeisk arrestordre vart skriven ut mot Puigdemont, men den vart oppheva av ein spansk dommar i desember.
Dommaren understreka likevel at den avsette regionspresidenten vil bli arrestert dersom han vender tilbake til Spania.
(©NPK)
Eit stort pressekorps møtte den katalanske separatistleiaren Carles Puigdemont då han kom til København-flyplassen Kastrup måndag.
Foto: Tariq Mikkel Khan / Ritzau scanpix / NTB scanpix
