Rapport: Minst 242 sivile drepne i luftangrep i Libya dei siste seks åra
Minst 242 sivile skal vere drepne i luftangrep i Libya sidan opprørarar med luftstøtte frå Noreg og andre NATO-land styrta leiaren i landet Muammar Gaddafi.
Rapporten om luftangrepa er utarbeidd av organisasjonane Airwars og New America. London-baserte Airwars er ein uavhengig organisasjon som hentar inn og analyserer informasjon frå ei rekkje kjelder, mens New America er ei tankesmie som held til i Washington.
I rapporten er meir enn 2.000 luftangrep i det nordafrikanske landet dokumentert. Dei skal vera gjennomført av fire nasjonar og tre lokale militsgrupper sidan januar 2012. USA, Frankrike, Dei sameinte arabiske emirata og Egypt har slått til mot islamistiske ekstremistgrupper, og libyske fraksjonar har gått til åtak på kvarandre.
Minst 242 personar er drepne i angrepa, og talet kan vera så høgt som 295, ifølgje rapporten. Mellom 324 og 524 sivile skal ha blitt såra. Funna er i hovudsak baserte på nyheitsmeldingar og innlegg i sosiale medium.
Ifølgje rapporten, som skal vera den første i sitt slag, har ingen av nasjonane eller militsgruppene teke ansvar for nokre av dei sivile dødsfalla. Dei som stod bak angrepa har offentleg berre erkjent rundt halvparten av dei. I tillegg til dei sivile drepne, har minst 778 medlemmer av militante grupper mista livet.
(©NPK)
Det stig opp røyk etter det som skal ha vore eit luftangrep mot IS-mål i Sirte i Libya i september 2016. Ein fersk rapport konkluderer med at minst 242 sivile er drepne i slike angrep i landet dei siste åra. Foto: Manu Brabo / AP / NTB scanpix
