Skarstein med ny bestenotering

I oppvisningsklassen rodde Skarstein inn til tida 10.24,48 på 2000 meter, og ho forbetra med det den uoffisielle verdsrekorden med 23 sekund.

- Det kjendest som eg svevde gjennom heile løpet, og det flaut fantastisk i både hovud og kropp, seier Skarstein i ei pressemelding.

Den tidlegare bestenoteringa hennar vart sett i Beograd for tre veker sidan.

Kvalifiseringa vart gjennomført som tempokonkurranse, der utøvarane rodde åleine utan eit felt å konkurrere med.

- Eg må konkurrere med meg sjølv, og planen var å gå på verdsrekord, sa Skarstein.

Ho var nesten 56 sekund framfor toaren tyske Sylvia Pille-Steppart. Skarstein er regjerande verdsmeister og skal forsvare tittelen sin i Bulgaria seinare i sesongen.

Laurdag ror ho finale i Linz, på bana der det er VM neste år. Kvalifiseringa til Paralympics i Tokyo skal også gå føre seg der.

Den norske dobbeltsculleren med Erling Øyasæther og Jørgen Nilsson enda på femte- og sisteplass i sitt heat.

Elles deltar Noreg i Linz i ytterlegare sju klasser.

Kjetil Borch ror singlesculler, mens Noreg deltar i dobbeltfirar menn med Martin Helseth, Erik Solbakken, Jan Oscar Stabe Helvig og Olaf Tufte, kvinner ved Marianne Madsen, Thea Helseth, Anne Een Sture og Inger Kavlie.

Ask Jarl Tjøm ror lettvekt singlesculler, Kristoffer Brun og Are Strandli lettvekt dobbeltsculler menn, Siri Eva Kristiansen og Maia Lund lettvekt dobbeltsculler kvinner, Didrik Wie-Soltvedt, Oskar Sædal, Jens Holm og Lars Benske lettvekt dobbeltfirar.

(©NPK)

Birgit Skarstein rodde inn til verdas beste tid i pararoing for kvinner i Linz fredag. Foto: Geir Olsen / NTB scanpix