SOHR: 400 sivile drepne i Aust-Ghouta på fem dagar
400 sivile er dei siste fem dagane blitt drepne i angrep mot den opprørskontrollerte enklaven Aust-Ghouta ved Damaskus, ifølgje eksilgruppa SOHR.
- Fem dagar med luftangrep og tung artilleriskyting gjort av det syriske regimet og russiske allierte har ført til at 403 sivile er blitt drepne, blant dei 95 barn, heiter det i ei fråsegn frå den London-baserte eksilgruppa Syrian Observatory for Human Rights (SOHR) torsdag ettermiddag.
Torsdag kveld norsk tid samlast FNs tryggingsråd for å behandle eit resolusjonsforslag frå Sverige og Kuwait om å innføre 30 dagars våpenkvile i heile Syria. Forslaget opnar for humanitær hjelp og evakuering av sjuke og skadde i Aust-Ghouta. Det bur om lag 400.000 personar i enklaven, der provisoriske sjukehus og klinikkar er blitt hardt ramma i angrep.
(©NPK)
Kampane mot opprørarane i Aust-Ghouta har dei siste fem dagane ført til at 400 sivile er blitt drepne, ifølgje nye tal frå SOHR. Foto: AP / NTB scanpix
