Stortinget blokkerer tilgangen til utanlandske spelselskap
Opposisjonen på Stortinget har fått fleirtal for å endre og stramme inn spelpolitikken i Noreg. No blir utanlandske spelselskap blokkert.
Arbeidarpartiet, KrF, SV og Senterpartiet har gått saman om åtte konkrete tiltak som dei meiner vil redusere faren for spelavhengigheit. Forslaget fekk fleirtal i familie- og kulturkomiteen på Stortinget tysdag. Formelt blir tiltaka først vedtatt av Stortinget 7. mai, skriv VG.
Sigeren til opposisjonen er eit nederlag for regjeringspartia, og kulturminister Trine Skei Grande (V), som vil ha eit prøveprosjekt for lisensordning for utanlandske spel.
Forslaget som no har fått fleirtal, beskyttar monopolet til Norsk Tipping og gjer det ifølgje partia langt vanskelegare for utanlandske spelselskap.
Hovudpunkta i forslaget er at utanlandske spelselskapa blir IP-blokkert, at Lotteritilsynet får utvida fullmakter, og dessutan må Norsk Tipping reklamere mindre for eigne spel.
- Det er stort at opposisjonen ser verdien av å stramme inn spelpolitikken i Noreg ved å gjere den meir ansvarleg, seier Geir Jørgen Bekkevold (KrF) i ein kommentar til VG.
Han understrekar at innstramminga er til det beste for svært mange spelavhengige i Noreg.
(©NPK)
Illustrasjonsfoto: Erlend Aas / NTB scanpix
