Trine Rønning blir J15-landslagstrenar
Etter 162 A-landskampar for Noreg er Trine Rønning klar for å bidra til å utvikle nye landslagskjemper. Ho er blitt landslagstrenar for J15-laget.
- Det er kjempeartig. Det å ta steget frå å vere fotballspelar til å vere trenar, det er noko heilt anna. Eg gler meg verkeleg til å ta fatt på oppgåva, seier 35-åringen til fotball.no.
Ho jobbar allereie som prosjektleiar for jentesatsinga i NFF Telemark og som fagansvarleg i fotballforbundet for Telenor Xtra. No blir det trenarjobb i tillegg.
- Eg ser fram til å få lov til å vere med å påverke og utvikle dei som kjem nedanfrå, og ikkje minst lære dei kva fotball handlar om, seier Rønning.
J15-jobben blei ledig då Lena Tyriberget begynte i Avaldsnes.
(©NPK)
Trine Rønning blir ny landslagstrenar for J15-laget til Noreg. Foto: Berit Roald / NTB scanpix
