USAs Høgsterett: Politiet må ha ransakingsordre for å spore telefonar
Politiet må generelt sett ha ransakingsordrar før dei kan samle informasjon om der mistenkte i kriminalsaker har brukt mobilane sine, seier USAs Høgsterett.
Fem av ni dommarar stilte seg bak rettsavgjerda som kom frå USAs høgste rettsinstans fredag.
Den reknast som ein stor siger for personvernet i den digitale tidsalderen, og inneber ei stor endring frå gamle dagar. Då kunne styresmaktene gå til telefonselskapa og innhente informasjon om kva for nummer som hadde vore ringt, utan å i forkant ha fått innvilga ein ransakingsordre.
Fredagens rettsavgjerd blei forfatta av høgsterettsjustitiarius John Roberts, som fekk støtte frå domstolens fire liberale dommarar.
Konservative Roberts understrekar at rettsavgjerda berre handlar om sporing av mobiltelefonar, og at den ikkje gjeld innhenting av informasjon frå andre typar forretningar, blant anna frå bankar.
Han påpeiker også at politiet framleis vil ha moglegheit til å respondere på krisesituasjonar og innhente informasjon utan ransakingsordre.
Dommarane Anthony Kennedy, Samuel Alito, Clarence Thomas og Neil Gorsuch tok dissens. Kennedy skriv at domstolens «nye og så langt uprøvde kurs vil hindre politiets arbeid» og «føre til at forsvararar og dommarar må gjette i åra som kjem».
Rettsavgjerda kom i samband med saka mot Timothy Carpenter, som blei dømt til 116 år i fengsel for rolla si i ei rekkje ran av Radio Shack og T-Mobile-butikkar i Michigan og Ohio. I saka mot Carpenter brukte aktoratet mobiltelefonbevis som var innhenta utan ransakingsordre.
(©NPK)
Illustrasjonsfoto: Audun Braastad / NTB scanpix.
