14 prosents vekst i daglegvarehandelen i første halvår
Den norske daglegvaremarknaden har hatt ein verdivekst på 12 milliardar kroner så langt i år. Lite grensehandel og fleire måltid heime har prega utviklinga.
I veke 11, då Noreg stengde for å bremse koronapandemien, var verdiveksten i norske butikkar omkring 50 prosent høgare enn i same veke i fjor, viser ein rapport om næringa frå analyseselskapet Nielsen Norway.
Til samanlikning var verdiveksten i daglegvarebransjen i 2019 på 1,9 prosent.
Drikkevarer og tobakk
Rapporten nemner faktorar som karantenereglar som forhindra grensehandelen, fleire måltid heime som følgje av stengde institusjonar, heimekontor og heimepåske som sentrale for veksten i daglegvaremarknaden. Veksten var sterkast i folkerike område nær svenskegrensa – Østfold, Vestfold, Akershus og Oslo.
I andre kvartal åleine låg verdiveksten på 20 prosent. Størst verdivekst er det ikkje overraskande innan kategoriar som
drikkevarer og tobakk. Sistnemnde har hatt ein verdivekst på over 30
prosent.
Kioskmarknaden slit
Rapporten viser òg endringar innanfor nærliggjande næringar. 27 prosent av dei spurde i Nielsens undersøking oppgir å ha handla daglegvarer på nett under pandemien, og Kolonial.no melder om venta totalvekst på 70 prosent i 2020 målt mot 2019. Butikkar som Europris og Rusta melder òg om sterk vekst.
Derimot slit kioskmarknaden, som har tapt ein firedel av omsetnaden sin. Også bensinstasjonar opplever ein mindre nedgang.
(©NPK)
Lange køar på ein Kiwi-butikk i Oslo 12. mars, då Noreg stengde. Den veka var verdiveksten i daglegvarebransjen i forhold til same veke i fjor på om lag 50 prosent.
Foto: Lise Åserud / NTB scanpix
