34 elitesoldatar drepne i Taliban-angrep
34 elitesoldatar er drepne i eit Taliban-angrep i Badghis-provinsen vest i Afghanistan, opplyser lokale styresmakter.
Angrepet skjedde i Ab Kamari-distriktet tysdag kveld, men vart først kjent då innbyggarar i området frakta dei drepne soldatane til provinshovudstaden torsdag.
Ifølgje leiaren av provinsrådet, Bahauddin Qadesi, vart minst elleve soldatar i den afghanske spesialstyrken drepne etter først å ha vorte tatt til fange.
I Ghazni-provinsen søraust i Afghanistan vart ein afghansk oberst drepen av ein Taliban-infiltratør onsdag kveld.
Taliban vart drive ut av Kabul då USA og andre vestlege land bomba ein allianse av krigsherrar til makta for snart 18 år sidan.
Anslagsvis 110.000 menneske er drepne i krigshandlingar sidan, og rundt 5 millionar afghanarar lever som flyktningar i og utanfor eige land.
Taliban kontrollerer no omtrent halvparten av Afghanistan, der USA og Nato framleis har stasjonert soldatar.
Opprørarane har sidan i fjor forhandla med USA om ei våpenkvile og tilbaketrekking av alle utanlandske styrkar frå Afghanistan.
(©NPK)
