650.000 røykvarslarar bør bytast ut
Røykvarslarar som ikkje har batteripute, bør skiftast ut, tilrår Direktoratet for byggkvalitet og Direktoratet for samfunnstryggleik og beredskap (DSB).
Dei har fått bekymringsmeldingar om at røykvarslarar som ikkje har batteripute for eit 9-voltsbatteri, som ofte blir kalla røykvarslarbatteri, har vorte svært varme og har kortslutta, noko som i nokre tilfelle har ført til røykutvikling.
– Ifølgje ei undersøking frå Prognosesenteret er det cirka ti millionar røykvarslarar i norske hus og hytter. Rundt 650.000 av desse er utan batteripute. Vi oppmodar alle som har røykvarslarar som er nokre år gamle, om å sjekke røykvarslarane sine heime eller på hytta. Røykvarslarar utan batteripute til 9-voltsbatteri bør skiftast ut, seier Per-Arne Horne i Direktoratet for byggkvalitet.
(©NPK)
