Ålesund politimelder og stengjer restaurant
Ålesund kommune stengjer restauranten Toldboden for brot på smittevernreglar. Selskapet bak blir politimeldt.
– Vi har aldri hatt så mange smitta før i Ålesund. Hovudsakleg er dette smittevegar som stammar frå Toldboden, seier ordførar Eva Vinje Aurdal.
Ordføraren seier at kommunen har fått mange urovekkjande tilbakemeldingar om smittevernet på restauranten. Ifølgje kommunen har restauranten utvist grov aktløyse ved å ikkje følgje smittevernreglane i tilstrekkeleg grad.
Restauranten må halde stengt i éi veke, og selskapet som står ansvarleg for Toldboden, er politimeldt for brot på smittevernreglane.
Minst 53 smittetilfelle i Ålesund og andre kommunar er knytt til utbrotet på Toldboden, ifølgje kommunen.
Drivarane av Toldboden ønskjer ikkje å kommentere saka overfor NRK. NTB har ikkje lykkast å komme i kontakt med dei.
Ålesund, Sula og Giske innførte nyleg strenge koronatiltak. Mellom anna måtte kultur- og underhaldningsstader stengje, medan arrangement og skjenking vart forboden. Tiltaka gjeld fram til 10. mai.
(©NPK)
Ålesund kommune er for tida prega av koronasmitte
Foto: Paul Kleiven / NTB / NPK
