Amerikansk hangarskip setr kursen mot Noreg
Det amerikanske hangarskipet USS Harry S. Truman er på veg til farvatna utanfor Noreg.
Det stadfestar Forsvarets operative hovudkvarter.
- Vi har forstått at dei ønsker å trene under arktiske forhold, og vi har ein god dialog om korleis vi kan få til noko saman, seier oberst Eystein Kvarving til NTB.
Han legg til at hangarskipet vil vere i internasjonalt farvatn, men i nærområda til Noreg.
Besøket skjer samstundes med Trident Juncture, den store Nato-øvinga i Noreg denne hausten, der meir enn 40.000 soldatar frå 30 land skal delta. Øvinga går om få veker inn i sin mest intensive fase.
Men det er så langt ikkje stadfesta at USS Harry S. Truman skal delta i Trident Juncture.
- Mens den er i regionen, skal flåtegruppa delta i ei rekke operasjonar og øvingar, seier kommandørkaptein Kyle Raines i det amerikanske sjøforsvaret i ei utsegn til NTB.
- Men av sikkerheitsgrunner kan eg ikkje diskutere spesifikke framtidige operasjonar, seier han.
USS Harry S. Truman er 333 meter lang og har plass til fleire kampfly om bord enn det finst i heile det norske luftforsvaret.
Det atomdrivne hangarskipet har dei siste dagane halde seg i farvatna utanfor Island.
(©NPK)
President Donald Trump i USA sender ein av sine mektigaste flåtestyrkar i retning Noreg. Foto: Alex Brandon / AP / NTB scanpix
