Avis: Nytt smittetilfelle i Romanias EM-tropp
Den rumenske høgrekanten Laura Chiper Moisă har testa positivt for koronaviruset etter framkomst i EM-byen Kolding, skriv avisa GSP.
Smittetilfellet er det første i Romania-troppen sidan laget kom til Danmark. Frå før er nøkkelspelaren Crina Pintea og to massørar koronasmitta hos laget som etter planen skal møte Noreg i gruppespelet 7. desember.
Etter den positive koronaprøva har Moisă vorte isolert frå resten av laget, og ho er dermed på eit anna hotell, skriv NRK og siterer GSP.
Romania er sett opp med opningskamp mot Tyskland torsdag. Same kveld speler Noreg mot Polen, som også har hatt store koronautfordringar med nesten 20 smitta spelarar inn mot meisterskapen.
EM-laga lever i ei særs streng boble frå dei kjem til Danmark. Det er mellom anna ikkje lov å gå ut av hotellet med mindre ein skal inn på ein buss til trening eller kamp.
Spelarane må nytte munnbind og hanskar når dei forsyner seg av mat.
I tillegg kjem koronatesting kvar 72. time.
(©NPK)
Laura Chiper Moisă, heilt til venstre i biletet, er smitta av koronaviruset. Foto: Vidar Ruud / NTB
