Baldwin seier hjartet hans er knust etter dødsulykke på filmsett
Skodespelar og produsent Alec Baldwin kallar den dødelege skyteepisoden på filmsettet for ei tragisk ulykke. – Hjartet mitt er knust, seier han.
Baldwin seier på Twitter fredag at han samarbeider fullt ut med politietterforskinga for å finne ut korleis tragedien kunne skje.
– Det finst ikkje ord for å skildre sjokket og sorga etter den tragiske ulykka som tok livet av Halyna Hutchins, ei kone, mor og den djupt beundra kollegaen vår, tvitrar Baldwin.
– Hjartet mitt er knust når eg tenkjer på mannen hennar, son deira og alle som elska Halyna, legg 68-åringen til.
Filmfotografen Hutchins vart drepen, og regissøren Joel Souza vart såra under innspelinga av westernfilmen «Rust» i New Mexico i USA torsdag.
Kontoret til sheriffen i Santa Fe har sagt at Hutchins og Souza «blei skotne då eit rekvisittvåpen blei fyrt av Alec Baldwin». Det er for tidleg å fastslå kva slags type patroner som vart brukte, ifølgje politiet.
Ein talsperson for Baldwin, som er både produsent og skodespelar i filmen, har sagt at det skjedde ei ulykke då han fyrte av rekvisittvåpenet med lauspatroner.
(©NPK)
Alec Baldwin snakkar i telefonen på parkeringsplassen utanfor sheriffens kontor i Santa Fe etter at han blei avhøyrt om ulykka. Foto: Jim Weber/Santa Fe New Mexican via AP / NTB
