Borgarmeisteren i London ber fotballklubbane i byen om medisinsk hjelp
Borgarmeisteren i London, Sadiq Khan, har skrive til fotballklubbane i byen og bede om hjelp frå dei medisinske apparata deira i kampen mot koronaviruset.
– I det felles arbeidet vårt for å handtere trusselen frå koronaviruset er samfunnsånda til fotballklubbane våre eit lysande førebilete. Fleire av dei har allereie komme med tilbod om støtte og hjelp i lokalmiljøa sine, seier Khan ifølgje BBC.
– Denne veka har eg skrive til proffklubbane til hovudstaden og skissert kva dei kan gjere for å hjelpe det fantastiske helsestellet vårt, og eg er takksam for dei positive svara.
Ni klubbar har fått brev: Arsenal, Chelsea, Crystal Palace, West Ham, Fulham, Charlton, Queens Park Rangers, Brentford og Millwall. Tottenham er samarbeider allereie tett med dei lokale styresmaktene om hjelp i kampen mot viruset.
Khan har bede klubbane om å stille til disposisjon medisinsk ekspertise som legar, fysioterapeutar og førstehjelpsfolk i tillegg til ulike klubbfasilitetar.
Tottenham melde måndag på nettstaden sin at dei har stilt arenaen til klubben til rådvelde i hjelpearbeidet. I første omgang blir parkeringsanlegget under stadionet nytta som lagerplass for organisasjonar som leverer mat til dei mest sårbare i byen.
(©NPK)
Fotballklubbane i London, her ved Chelsea og Olivier Giroud, har fått brev frå borgarmeister Sadiq Khan med bønn om hjelp i kampen mot koronaviruset. Responsen har vore overveldande positiv. Foto: Matt Dunham, AP / NTB scanpix
