Byrådet i Oslo vil ha moglegheit til å forby fyrverkeri
Miljøbyråden i Oslo ber regjeringa sørgje for at kommunane får heimel til å innføre lokale forbod mot fyrverkeri.
– Eg meiner at fyrverkeri heilt klart er utdatert, skriv Sirin Stav (MDG) i eit brev til justisminister Emilie Enger Mehl (Sp).
– Vi må framover tenkje nytt og grønt om korleis feiringar og markeringar kan skje – utan fyrverkeri, seier ho til NRK.
Kravet kjem etter fyrverkerioppskyting frå eit skip på Filipstad 18. mai. Mange reagerte på dei høge smella seint på kvelden. Brann- og redningsetaten hadde gitt løyve til det kraftige fyrverkeriet, men Oslo-folk vart ikkje varsla på førehand.
Fyrverkeri er i utgangspunktet berre tillate på nyttårsaftan. Dei som vil skyte opp rakettar elles i året, må søkje brannvesenet om dispensasjon. Men brannvesenet seier dei ikkje har myndigheit til å avslå ein søknad basert på kriterium som støy, miljøvern og dyreomsyn.
– Vi må kunne ta omsyn også til støy, luftkvalitet, dyrevelferd og helsa til befolkninga, meiner Stav.
– Eg trur justisministeren og regjeringa har forståing for eit ønske om lokalt sjølvstyre, poengterer miljøbyråden.
(©NPK)
Dette kan det bli slutt på. Fyrverkeri er utdatert, meiner miljøbyråden i Oslo.
Foto: Ørn E. Borgen / NTB
