Dennis Hauger på 14.-plass i Barcelona-kvalifisering
Dennis Hauger måtte nøye seg med 14.-plass i kvalifiseringa til helgas Formel 2-runde i Barcelona. Det gir dårleg startposisjon i løpet i helga.
Ei kort stund såg det ut til at han skulle få den viktige 10.-plassen med minste margin, men heilt på tampen vart tida hans slått av fire bilar til.
Føraren på 10.-plass får starte først i sprintløpet laurdag. Då blir rekkjefølgja blant dei ti beste snudd på hovudet. I hovudløpet søndag startar bilane i rekkjefølgja frå kvalifiseringa. For Haugers del blir det 14. startposisjon i begge løpa i helga.
Å ta vare på dekka var viktig under kvalifiseringa. Dei to Prema-bilane noterte sine tider tidleg, og dei siste ti minutta såg Hauger og makkar Jehan Daruvala konkurrentane angripe dei. Hauger var på 4.-plass då han køyrde i depot, men han måtte sjå ei rekkje rivalar skyve han nedover.
Han vart liggjande ei stund på 10.-plass, og marginane såg ut til å vere på hans side då Amaury Cordeel kom inn på nøyaktig same tid. Sidan Hauger noterte tida først ville han gå føre. Det vart mindre viktig då fire andre bilar slo han i dei par siste minutta av kvalifiseringa.
Jack Doohan vann kvalifiseringa, medan Daruvala vart nummer fire. Hauger var 0,769 sekund bak Doohan.
(©NPK)
Dennis Hauger måtte nøye seg med 14. beste tid i kvalifiseringa til VM-løpet i Formel 2 i helga. Foto: Terje Pedersen/ NTB
