Equinor investerer 2,3 milliardar i Gullfaks-feltet
Oljegiganten Equinor investerer, saman med Petoro og OMV, 2,3 milliardar for å hente opp 17 millionar fat oljeekvivalentar i Gullfaks-feltet i Nordsjøen.
Gullfaks-prosjektet, som inneber boring av sju nye brønnar, vart tysdag presentert på Oljeindustripolitisk Seminar som i desse dagane blir halde i Sandefjord. Konserndirektør for utvikling og produksjon norsk sokkel Arne Sigve Nylund i Equinor overleverte søknaden til olje- og energiminister Kjell Børge Freiberg under seminaret.
- Vi har som ambisjon å halde fram med lønnsam produksjonen frå norsk sokkel i fleire tiår. Eit stort bidrag skal komme frå brønnar som kan borast billeg og raskt nær eksisterande infrastruktur, seier Nylund.
Dei nye brønnane skal borast i Shetlandsgruppa, som er eit kalkreservoar som ligg over hovudreservoaret på Gullfaks-feltet i Nordsjøen. Kalkreservoaret har skapt utfordringar for boringsarbeidet, men ein brønntest i 2012 viste at det var mogleg å få god oljeproduksjon i reservoaret.
- Gullfaks-partnarane har derfor investert over ein milliard kroner i produksjonsbrønnar i denne formasjonen sidan 2013, som så langt har gitt over seks millionar fat olje frå Shetland/Lista fase 1, opplyser Equinor.
Oljedirektoratet omtalar prosjektet som eit positivt døme på at tette reservoar i nokre tilfelle kan utviklast lønnsamt gjennom gode studiar og ny teknologi.
(©NPK)
Konserndirektør Arne Sigve Nylund i Equinor. Arkivfoto: Carina Johansen / NTB scanpix
