EU og Storbritannia gjer seg klare til kaos
Med berre 100 dagar igjen til skilsmissa blir beredskapen trappa kraftig opp for eit «no deal»-scenario mellom EU og Storbritannia.
- Dette er ei øving i skadeavgrensing, seier visepresidenten i EU-kommisjonen Valdis Dombrovskis.
Han la onsdag fram ei omfattande pakke med krisetiltak som kan tre i kraft i EU viss «no deal» blir ein realitet.
Krisetiltaka vil berre vere mellombelse, nokre skal vare i ni månader, andre i eitt eller to år. Samtidig gjer EU-kommisjonen det klart at EU berre vil ta grep når det er i EUs eiga interesse å gjere det. Tiltaka kan avblåsast når som helst.
EUs mål er å gjere landinga mjukare, forklarar Dombrovskis.
- Men la oss ha i mente at dette ikkje på nokon måte kan erstatte fordelane ved å ha ein utmeldingsavtale - og iallfall ikkje fordelane ved framleis EU-medlemskap, seier han.
Bakteppet er aukande bekymring for at Storbritannia vil krasje ut av EU utan å ha nokon skilsmisseavtale på plass.
EU og Storbritannia vart einige om eit avtaleforslag tidlegare i haust, men avtalen har møtt kraftig motstand i Underhuset i London, der ei avstemming no er venta i midten av januar.
Også den britiske regjeringa vedtok denne veka at førebuingane til ei kaotisk skilsmisse utan avtale skal trappast kraftig opp.
(©NPK)
Sjefen i EU-kommisjonen Jean-Claude Juncker saman med Storbritannias statsminister Theresa May på EUs toppmøte i Brussel førre veke. Foto: Alistair Grant / AP / NTB scanpix
