EU-sanksjonar mot Krim og Sevastopol utvida
EU har vedtatt å forlenge sanksjonane som er retta mot Krimhalvøya og Sevastopol i eitt år til.
Sanksjonane vart innførte etter at Russland annekterte halvøya som internasjonalt er anerkjent som ein del av Ukraina. Import av varer frå Krim og hamnebyen Sevastopol til EU er forbode. Bedrifter og borgarar i Unionen har heller ikkje lov til å investere på Krim, og det er restriksjonar på turistnæringa og på sal av teknologi og varer til Krim.
Det nyaste EU-vedtaket forlenger sanksjonane, som berre omfattar Krim og Sevastopol, med eitt år fram til 23. juni 2020.
På toppmøtet i Brussel denne veka er det venta at medlemslanda òg blir samde om å forlenge dei økonomiske sanksjonane som omfattar fleire sektorar i den russiske økonomien. EU innførte sanksjonar mot både Russland og Krim etter annekteringa i 2014.
(©NPK)
