Fotografen som tok det 60-tallssymbolske biletet av Beatles, er død
Som ung fotograf for eit jenteblad gjekk Fiona Adams berre rett bort til Beatles i eit TV-studio, sette seg ned og spurde om dei ville stille opp for eit bilete veka etter.
– Dei sa «greit». Så enkelt var det den gongen. Du trong ikkje gå gjennom ein manager eller andre offisielle kanalar, fortalde Adams i 2008. No minnest fotografen, som gjekk bort i slutten av juni, 84 år gammal, av medium verda rundt etter at familien offentleggjorde bortgangen hennar tidlegare i juli.
Fiona Adams, som ho heitte i 1963 då ho jobba for bladet Boyfriend, fotograferte bandet på ein bomberuin frå andre verdskrigen i London. Der slepte ho kamerautstyret sitt ned i krateret – medan dei fire Beatles-gutane balanserte på kanten.
– Dei gjorde sitt og venta tolmodig, i vakker silhuett mot himmelen og bygningane. Eg stilte inn kameraet og ropte «en, to, tre – hopp!". Og dei hoppa – to ganger. Høge hælar og alt, mimra Adams videre.
Og biletet blei det ikoniske biletet der bandet hoppar i veret. Det sto først på trykk i Boyfriend, før bandet brukte det som omslagsbiletepå sin «Twist and Shout»-EP i juli 1963, ifølgje BBC.
Då det britiske portrettgalleriet i 2009 stilte ut nokre av bileta til Fiona Adams, kalla kuratoren det for «et av bildene som definerte det tyvende århundrets kultur», der det symboliserte den nye ungdomskulturen.
Men ho fotograferte òg Rolling Stones, David Bowie, Dusty Springfield, Bob Dylan, The Hollies og Jimi Hendrix for Boyfriend og bladet Fabulous, før ho i 1967 brått hoppa av. Det forklarte ho slik i 2008-intervjuet med Culturevoyage:
– Haldninga til banda endra seg, dei var fjernare, og narkotikabruk hadde sin pris. Som fotograf kan du a ldri slappe av, du må alltid kome opp med nye idear. Eg var ein streng oppdragsgjevar for meg sjølv, og det vart umogleg å få ting til å sjå annleis ut.
Resten av yrkeslivet var Adams først reklamefotograf, før ho opna eit vanleg fotostudio på kanaløya Guernsey, der få av kundane hadde nokon aning om at ho hadde stått midt i hjartet av Londons musikkliv på det legendariske 60-talet.
(©NPK)
Dette biletet av Beatles, teke av Fiona Adams i 1963 og som her prydar «Twist and Shout»-EP-en til bandet same år, er blitt ikonisk som eit symbol for «the swinging sixties» og den framstormande ungdomskulturen. Foto: Amazon NTB kultur
