Frontex-sjefen blir grilla i EU-parlamentet

Medium har avslørt at mannskap frå den greske kystvakta har stansa migrantar og sendt dei tilbake til tyrkisk farvatn. Dette skal personell frå Frontex ha visst om og delteke i. Noreg er òg med i Frontex-samarbeidet.

Under utspørjinga i borgarrettskomiteen i EU-parlamentet kan Frontex-sjef Fabrice Leggeri vente seg spørsmål om påstandane og om kva den interne granskinga har funne. Det vil truleg òg bli spørsmål om eit styremøte i Frontex som vart halde etter at EU-kommisjonen bad om det.

Også før medierapportane hadde det komme bekymringsmeldingar i årsrapporten til konsultasjonsforumet til Frontex. Der vart det peika på manglande rutinar for å fange opp og ta tak i rettsbrot knytt til verksemda til grensestyresmakta.

Forumet omfattar aktørar som FNs høgkommissær for flyktningar, Europarådet, Den internasjonale organisasjonen for migrasjon (IOM), EUs kontor for asylstøtte og byrået i unionen for grunnleggjande rettar.

I eit møte i juli sa Leggeri til den same komiteen i parlamentet at Frontex-personell ikkje hadde vore involvert i å returnere migrantar. Ei hending med det danske mannskapet på eit Frontex-skip vart beskriven som ei misforståing.

(©NPK)

Sjefen for EUs grensestyresmakt må svare på om folket hans har vore med på å avvise migrantar og sende dei tilbake til tyrkisk farvatn. Illustrasjonsfoto: Michael Varaklas / AP / NTB