Giuliani avviser at Trump bad Cohen lyge til Kongressen
Donald Trump bad ikkje den tidlegare advokaten sin Michael Cohen om å lyge til Kongressen, forsikrar Trumps noverande advokat Rudy Giuliani.
Alle slike påstandar er kategorisk falske, heiter det i ei fråsegn frå Giuliani fredag.
Nettstaden BuzzFeed skreiv torsdag at Trump bad Cohen gi uriktige opplysningar til Kongressen i 2017. Saka gjaldt Trumps tidlegare planar om eit byggjeprosjekt i Moskva og når planen vart skrinlagd.
Viss det stemmer at Cohen vart beden om å feilinformere USAs folkevalde, har presidenten truleg brote lova. BuzzFeeds artikkel var basert på opplysningar frå anonyme kjelder med kjennskap til spesialetterforskar Robert Muellers Russland-gransking.
Trumps talsmann Hogan Gidley vart fredag intervjua om saka av TV-stasjonen Fox News, og han beskreiv BuzzFeeds artikkel som «fullstendig latterleg». Gidley kom likevel ikkje med noka klar tilbakevisning av påstandane.
Presidenten sjølv hevdar i ei Twitter-melding at Cohen lyg i håp om å få redusert fengselsstraff. Cohen er dømt til tre års fengsel for mellom anna ulovleg valkampfinansiering. Advokaten har tilstått å ha utbetalt «hysjpengar» til kvinner som hevdar å ha hatt sex med Trump.
I tillegg har Cohen innrømt å ha utbetalt pengar til eit teknologiselskap som visstnok prøvde å manipulere meiningsmålingar i favør av Trump.
Cohen skal etter planen vitne under eid i ei høyring i Kongressen i februar. Den tidlegare advokaten til presidenten har lova å gi ei «fullstendig og truverdig» framstilling av det tidlegare arbeidet sitt for Trump.
(©NPK)
President Donald Trump blir skulda for å ha bedt den tidlegare advokaten sin lyge til Kongressen. Foto: Evan Vucci / AP / NTB scanpix