Grande og Elvestuen signerte Hongkong-opprop
Som dei første stortingsrepresentantane har Venstres Trine Skei Grande og Ola Elvestuen signert eit politisk opprop mot den nye sikkerheitslova for Hongkong.
Bakgrunnen i saka er at Kina ønskjer å innføre ei ny sikkerheitslov for Hongkong. Lokalbefolkninga fryktar at det skal undergrave fridommane til den tidlegare britiske kolonien.
Venstre-duoen har til liks med over 250 andre parlamentarikarar frå ei rekkje land signert oppropet som er igangsett av Chris Patten som var den siste britiske guvernøren i Hongkong.
– Vi må sende eit klart signal om at det internasjonale samfunnet ikkje kan akseptere at den internasjonalt anerkjende kinesisk-britiske avtalen blir broten av kommunistregimet i Beijing. Internasjonale avtalar er grunnbjelken i den liberale verdsordenen, og menneskerettane til befolkninga i Hongkong må respekterast, seier Elvestuen og Grande i ei pressemelding.
Duoen oppmodar no andre norske folkevalde til å gjere det same.
Då britane tilbakeførte Hongkong til Kina i 1997, vart det avtalt at Hongkong skal få behalde sitt eige rettssystem og politiske system med fulle fridommar fram til 2047.
(©NPK)
Venstre-nestleiar Ola Elvestuen og leiar Trine Skei Grande støttar ikkje Kinas ønske om å innføre ei ny sikkerheitslov for Hongkong.
Foto: Lise Åserud / NTB scanpix
