Haaland og tre norske kvinner nominert til årets lag i Meisterligaen

Borussia Dortmunds brennheite spiss er blant dei 15 som er nominerte i klassen for angrepsspelarar. Det er fotballfans og eit eige panel som avgjer korleis ellevaren til slutt blir.

Robert Lewandowski, Cristiano Ronaldo, Lionel Messi, Kylian Mbappé og Mohamed Salah blir blant Haalands konkurrentar om ein plass på årets lag.

20-åringen frå Jæren vart nyleg kåra til den beste spelaren i Europa under 21 år. Det gav han Golden Boy-trofeet i regi av avisa Tuttosport.

Haaland står med heile 16 mål på sine 12 første kampar i Meisterligaen. Ingen har tidlegare komme opp i så mange skåringar så fort i den gjævaste europacupen.

I kvinneklassen er heile tre norske spelarar med blant dei ein kan stemme på. Caroline Graham Hansen (Barcelona) er norsk innslag blant spissane, medan Ingrid Syrstad Engen (Wolfsburg) er nominert blant midtbanespelarane og Maren Mjelde (Chelsea) blant forsvarsspelarane.

(©NPK)

Erling Braut Haaland er brennheit i både Bundesliga og Champions League. Foto: Martin Meissner / AP / NTB