Hansen mistar VM-kvalifiseringskampar med skade
Rosenborg-målvakt André Hansen er kneskadd og kan ikkje spele for Noreg i dei viktige VM-kvalifiseringskampane mot Tyrkia og Montenegro i oktober.
Det melder Rosenborg. Hansen måtte bytast ut på grunn av knesmellen i seriekampen på søndag mot Mjøndalen.
– Undersøkingar viser at André pådrog seg ein lett bandskade i kneet. Dermed ventar veker med alternativ trening, seier RBK-lege Reidar Due til nettstaden til klubben.
Hansen er førsteval på målvaktplass sidan Rune Almenning Jarstein har vore ute med sjukdom i lang tid. Han synest det er kjedeleg å gå glipp av dei kommande landskampane.
– Det er sjølvsagt veldig kjedeleg å miste dei kommande landskampane. Eg skal gjere det eg kan for at skadeopphaldet blir så kort som mogleg, slik at eg kan vere disponibel for RBK i ei svært spennande gulljakt og for landslaget når VM-billetten forhåpentleg blir sikra i november, seier Hansen.
(©NPK)
Rosenborg-keeper André Hansen mistar Noregs neste VM-kvalifiseringskampar.
Foto: Ole Martin Wold / NTB
