Hareide: «Reelle avklaringar» står att i sonderinga
Etter tre veker med sonderingar er KrF framleis ikkje klar for å starte formelle regjeringsforhandlingar med Høgre, Framstegspartiet og Venstre.
Onsdag samla KrF seg til eit omfattande møtemaraton på Stortinget: Først skulle partiet ha eit vel to timar langt sentralstyremøte, deretter eit landsstyremøte, og til slutt eit kort sentralstyremøte.
- Naturleg nok, med det vi veit som er på agendaen no, blir det ein status frå dei viktige samtalane som no pågår, seier KrF-leiar Knut Arild Hareide til NTB før møtet.
- Delegasjonen vår fortel om gode samtalar, men at det òg er ein del reelle avklaringar som naturleg nok ikkje har funne stad, legg han til.
- Kan du vere meir spesifikk på dette?
- Nei, eigentleg ikkje. Då er eg så presis som eg har grunnlag for å vere, seier Hareide.
KrF-leiaren ønskte i haust å søkje regjeringssamarbeid med Arbeidarpartiet og Senterpartiet, men tapte som kjent den interne dragkampen om retningsval. Det er grunnen til at KrF no sit i sonderingar om å gå inn i Solberg-regjeringa.
Hareide varsla på det ekstraordinære landsmøtet 2. november at han ville gå av viss partiet valde ein annan kurs enn han han tilrådde.
(©NPK)
KrF-leiar Knut Arild Hareide sier det framleis står att «reelle avklaringar» før partiet kan gå i formelle regjeringsforhandlingar med Frp, Høgre og Venstre. Foto: Terje Pedersen / NTB scanpix