Brei oppgang siste handelsdag på Oslo Børs

Tungt drive av brei oppgang i dei oljerelaterte aksjane enda Oslo Børs ved børsslutt i 17-tida på 799,46 poeng, noko som svarer til ein oppgang på 2,02 prosent.

Equinor-aksjen var den klart mest omsette fredag og steig 2.05 prosent. Bak oljegiganten på omsetningstoppen var det særleg Yara (opp 2,11 prosent), TGS (+4,92), Schibsted A (+4,32), Subsea 7 (+5,09), Norwegian (+3,12), og ikkje minst Petroleum Geo-Services (+10,79), som gjorde det sterkt på den siste aksjehandelsdagen i år.

Ved børsslutt fredag var dei svakaste aksjane innan sjømat, der SalMar hadde ein nedgang på 0,37 prosent. Deretter følgde Lerøy Seafood Group (+0,09), Marine Harvest (-0,27) og Bakkafrost (-0,09).

Nedgang i oljeprisen

Trass den seige sistedagen er det sjømataksjane som, ifølgje Oslo Børs, totalt sett trekte hovudindeksen mest opp i 2019. Norsk Hydro var på si side, som med ei negativ avkasting på 34,8 prosent, den enkeltaksjen som i 2018 trekte hovudindeksen mest ned.

På dei tonegivande børsane i Europa var det grøne tal fredag. DAX 30 i Frankfurt gjekk opp med 1,71 prosent, FTSE 100 i London hadde ein oppgang på 2,18 prosent, mens CAC 40 i Paris steig med 1,86 prosent.

Det var også ein nedgang i oljeprisen fredag. Ved 17-tida vart eit fat nordsjøolje selt for 52,40 dollar - eit fall på 2,19 prosent gjennom dagen.

Travelt børsår

Eit travelt børsår med det høgaste talet handlar nokosinne har gitt både store nedturar og oppturar.

Hovudindeksen starta året på 815,22 poeng, men løfta seg utover sommaren og hausten. Den 25. september nådde indeksen rekordhøge 946,43 poeng. Dei siste tre månadene har likevel verdien av aksjane falle jamt og trutt, og fredag så året ut til å ende rundt 800 poeng.

Oslo Børs kjem bra ut

I år er det første gong sidan 2011 at året endar med børsfall. Nedgangen er likevel på berre 1,84 prosent, eit langt betre år enn dei fleste andre børsar i verda. Nikkei-indeksen i Japan har til samanlikning gått ned med 12 prosent i år, mens Hang Seng-indeksen i Hongkong og Shanghai-indeksen i Kina mista høvesvis 14,8 prosent og 24,6 prosent.

Heller ikkje Europa har hatt noko godt børsår. DAX-indeksen i Frankfurt har falle med 18,3 prosent i 2018, mens FTSE-indeksen i London sokk med 12,7 prosent i år.

(©NPK)

Foto: Terje Pedersen / NTB scanpix