Kraftig auke i talet på sjølvmord blant kvinner i Japan
Sjølvmordsraten i Japan stig for første gong på elleve år, og særleg blant kvinner har talet på sjølvmord auka kraftig under koronapandemien.
Ifølgje japanske styresmakter vart det registrert 20.919 sjølvmord i 2020, ein auke på 3,7 prosent frå året før.
13.943 menn tok sitt eige liv i året som gjekk, og det var ein nedgang på 1 prosent.
Talet på sjølvmord blant kvinner auka derimot med heile 14,5 prosent til 6.976, viser ein førebels rapport frå japansk politi.
Økonomisk nedgang
Sjølv om Japan har sleppt relativt lett unna koronapandemien med under 5.000 dødsfall i ei befolkning på over 125 millionar, så er økonomien i landet hardt ramma og krympar kraftig.
Rundt 40 prosent av arbeidsstokken er mellombels tilsett eller har deltidskontraktar, og fleirtalet av desse er kvinner og unge.
Ein halv million har ifølgje økonomar mista jobben det siste halvåret.
Styresmaktene har samtidig auka meirverdiavgifta, og mange familiar slit no med å få pengane til å strekke til.
Aukande fattigdom
Over 10 millionar lever på mindre enn 160.000 kroner i året, og éin av seks lever i «relativ fattigdom» med ei inntekt som er under halvparten av den nasjonale medianen.
– Kvinner er meir utsette for dei endringane pandemien har forårsaka, sidan dei oftare har uregulert arbeid enn menn. Byrda med husarbeid og barn er samtidig tung, seier professor i sosiologi, Takanori Hirano, til Kyodo News.
(©NPK)
Japansk økonomi er hardt ramma av koronapandemien, og talet på sjølvmord aukar for første gong på elleve år. Foto: AP / NTB
