Heilraud dag på Oslo Børs
Oljeprisfall og auka spenning i handelskrigen mellom USA og Kina førte onsdag til børsnedgang i heile Europa. Hovudindeksen på Oslo Børs fall 2,26 prosent.
Frykt for den økonomiske utviklinga prega onsdag børsane i heile Europa, og børsfallet spreidde seg òg til Wall Street i USA, som opna svakt, skriv Dagens Næringsliv.
Hovudindeksen på Oslo Børs låg på 868,17 poeng ved opningstid onsdag og fall jamt utover dagen. Ved stengjetid var den verste dagen på Oslo Børs i år eit faktum, skriv Nettavisen. Indeksen enda på 853,12 poeng.
Det vart ein heilraud onsdag for nesten alle selskap, og verst gjekk det utover oljegigantane. På omsetningstoppen låg Equinor med eit fall på 2,03 prosent. Også Subsea 7 (-3,34), DNO (-6,32) og TGS (-4,01) gjekk på kraftige smellar.
Hydrogenselskapet NEL, som hamna på tredjeplass på omsetningslista, fall med 6,26 prosent. Også sjømatselskapa snubla: Mowi, Salmar og Lerøy Seafood fall med høvesvis 3,51, 3,38 og 2,11 prosent. Yara og Norsk Hydro fall med høvesvis 2,67 og 2,27 prosent.
Orkla var det einaste av dei store selskapa i omsetningstoppen som hadde oppgang - aksjen steig med 0,66 prosent.
Oljeserviceselskapet PGS vart taparen i dag med eit fall på heile 7,03 prosent. Det skjer dagen etter at selskapet steig med 7,1 prosent. Borr Drilling vann med ein auke på 1,91 prosent.
På dei leiande børsane i Europa vart det ein heilraud dag. I Frankfurt fall den tyske DAX-indeksen med 1,41 prosent, medan CAC 40-indeksen i Paris sokk med 1,81 prosent. Ved 17-tida låg FTSE 100-indeks i London an til å falle med 1,23 prosent.
Eit fat nordsjøolje vart onsdag ettermiddag omsett for 68,98 dollar fatet, ned 1,67 prosent. Eit fat amerikansk lettolje (WTI) vart då selt for 57,6 dollar, ned 2,5 prosent.
(©NPK)
Ved stengjetid onsdag var den verste dagen på Oslo Børs i år eit faktum. Illustrasjonsfoto: Gorm Kallestad / NTB scanpix
