Krutsterk VM-bronse til Mowinckel – Shiffrin verdsmeister i storslalåm
Ragnhild Mowinckel leverte ein forrykande konkurranse og tok VM-bronse i storslalåm i franske Meribel torsdag. Mikaela Shiffrin tok gullet.
Mowinckel var nummer seks etter første omgang, men køyrde seg opp på pallen.
Mina Fürst Holtmann var nummer sju etter første omgang. I finalen leverte 26-åringen ein ny svært solid omgang, men måtte sjå seg slått av då leiande Marta Bassino. Til slutt vart det ein sterk 6.-plass.
Thea Louise Stjernesund køyrde inn til bronse i parallellslalåm onsdag. Dagen etter lykkast ikkje romerikingen like godt i storslalåm. Ho var slått med halvtanna sekund i første omgang, noko som gav 14.-plass framfor annan omgang.
Der køyrde ho inn til leiing og klatra fleire plassar på listene. Den endelege fasiten vart 8.-plass.
Maria Therese Tviberg vart verdsmeister i parallellslalåm onsdag. Torsdag klarte ho ikkje følgje opp den prestasjonen. Ein stor feil undervegs i første omgang kosta mykje. Heller ikkje i omgang nummer to trefte gullvinnaren perfekt, men klatra oppover listene.
Til slutt enda dagen med 18.-plass for bergensaren.
(©NPK)
Ragnhild Mowinckel får ein klem i målområdet etter andre omgang i storslalåm for kvinner i VM i alpint i Méribel, Frankrike. Foto: Lise Åserud / NTB
