Mann sette fyr på seg sjølv i Praha
Ein mann sette fredag fyr på seg sjølv i sentrum av Praha, 50 år etter at studenten Jan Palach gjorde det same i protest mot Sovjets invasjon.
Mannen er alvorleg skadd og er lagt i kunstig koma med brannskadar på hovud og hender etter hendinga på Václav-plassen, opplyser tsjekkiske styresmakter.
Mannen helte ei brennbar væske over seg sjølv og tende på, før forbipasserande fekk sløkt flammane, ifølgje politiet.
Denne veka har Tsjekkia markert 50-årsdagen for Palachs protest med fakkeltog og fleire offisielle seremoniar.
Jan Palach vart verdskjent då han 16. januar 1969 protesterte mot okkupasjonen av Tsjekkoslovakia ved å setje fyr på seg sjølv på Václav-plassen, òg kjent som Wenzelsplassen.
Han døydde tre dagar seinare og vart eit kraftfullt symbol på motstanden mot den Sovjet-leidde militærinvasjonen 21. august 1968. Invasjonen knuste Praha-våren og stansa kommunistleiaren Alexander Dubceks reform- og liberaliseringspolitikk i landet.
Etter regimeskiftet og demokratiseringa i Tsjekkoslovakia i 1989 vart det sett opp eit Palach-monument på den berømte plassen i Praha. I tillegg er eit torg i ein annan del av byen kalla opp etter han.
(©NPK)
Tsjekkisk politi fotografert ved Wenzelsplassen fredag. Foto: Vit Simanek/CTK via AP / NTB scanpix
