Mental Helse Ungdom: Historisk satsing på psykisk helse i budsjettsemja

I revidert budsjett er det sett av 650 millionar til psykisk helsevern. Det er ei dobling frå pengesummen regjeringa opphavleg sette av.

– Det er inga regjering som har satsa så stort som regjeringa gjorde, og no blir det dobla. Det er historisk, seier generalsekretær Adrian Tollefsen i Mental Helse Ungdom til NTB.

– No er det opp til Stortinget, aktørane i helsevesenet og kommunane å følgje opp det regjeringa og Frp har fått til. Dei må sørgje for at det blir vedteke og at pengane blir brukte på riktig måte, seier Tollefsen.

Ny støtteordning

Framstegspartiet opplyser at midlane som blir sette av, vil auke kapasiteten i tilbodet til psykisk sjuke. Midlane er fordelte slik:

• 150 millionar ekstra til barne- og ungdomspsykiatrien.
• 100 millionar øyremerkte kjøp av privat behandlingskapasitet.
• 80 millionar meir til tilskotsordninga til kommunane og frivillige organisasjonar.
• Ei ny støtteordning på 10 millionar for frivillige aktørar som skal hjelpe barn og ungdom i tettbygde og levekårsutsette strøk.

Særleg det siste punktet blir trekt fram som viktig av Mental Helse Ungdom.

– Det betyr at det blir satsa på å hjelpe der det trengst mest, seier Tollefsen.

– Svarer på Kjøs-utvalet

Tollefsen meiner budsjettsemja langt på veg svarer på utfordringane det såkalla Kjøs-utvalet peika på. Regjeringas ekspertgruppe har granska innverknaden av pandemien på psykisk helse og rusbruk og lagt fram forslag til tiltak.

Nettopp verknaden av pandemien på psykisk helse blir òg trekt fram av Morten Stordalen, Frps helsepolitiske talsperson.

– Vi må ta grep no. Derfor har Frp prioritert dette i forhandlingane med regjeringspartia. Vi kan ikkje akseptere at menneske i djup krise ikkje får den hjelpa dei treng, seier Stordalen.

Ei satsing på psykisk helsevern var blant dei første krava Frp stilte i budsjettforhandlingane med regjeringspartia.

Svært bekymra

Stordalen seier han er svært bekymra for etterverknadene av pandemien på den psykiske helsa til befolkninga.

– Det har vore ei tøff og vanskeleg tid for mange i samfunnet vårt. Fleire har vorte permitterte eller har mista jobben. Eldre og sjuke har kjent på einsemda ved å ha vore avskorne frå besøk av sine næraste, seier Frp-politikaren.

– Barn og ungdom har i lengre tid ikkje kunna møte fysisk på skule eller fritidsaktivitetar. For mange av dei yngste kjennest eitt år i dei unge liva deira som ei heil æve. Vi strekkjer ut ei hand til alle dei som slit og som har behov for hjelp, seier han.

(©NPK)

Generalsekretær Adrian Tollefsen i Mental Helse Ungdom takkar Frp for satsing på psykisk helsevern. Foto: Kristoffer Sandven / Mental Helse Ungdom / NTB

Morten Stordalen, Frps helsepolitiske talsperson. Foto: Terje Pedersen / NTB