Mikkel-show senka Noreg i VM, 26-30-tap mot Danmark

Danskane hadde ei soleklar leiing eit kvarter før slutt, men det vart spenning mot slutten likevel etter sterk norsk finish. Etter tapet er det truleg berre éi oppskrift som kan gi norsk semifinale: Tre sigrar av tre moglege i hovudrunden.

Sander Sagosen hadde eit mareritt av ein 1. omgang. Fem skot (ein straffe) gav fem bom. Etter 28.22 fekk han ikkje spele meir i angrep inn mot pause. Sagosen starta òg på benken i 2. omgang.

Han scora det første målet sitt etter 45 minutt og avslutta kampen særs bra.

Heilt i motsett ende av skalaen opererte Paris Saint-Germain-kompisen Mikkel Hansen dei første 30 minutta. Sju scoringar på åtte forsøk og fleire målgjevande pasningar var bidraget hans på veg mot 17-14-leiing.

Noreg bomma på heile 12 av 26 forsøk i første omgang. Danskane hadde mykje høgare utteljingsprosent.

Dansk fordel

Danmark auka leiinga på dei første minutta av 2.-omgangen. Bore fram av tilskodarane vakna Niklas Landin igjen etter ein tyngre periode.

Han bidrog til at det stod 23-15 til danskane etter snautt 40 minutt.

Den norske troppen jubla ikkje då dommarnominasjonen vart offentleggjord torsdag morgon. Det var det grunnlag for. Det makedonske paret la seg på ei startlinje med 55-45-fordel Danmark.

Det tok ikkje lang tid før landslagssjef Christian Berge og den norske benken reagerte kraftig på avgjerder.

Slått

Men Noreg tapte ikkje kampen på grunn av dommarane. Prestasjonane hos fleire av spelarane var i periodar ikkje gode nok mot Danmark borte i eit meisterskap.

Då keeper Torbjørn Bergerud vart bytt ut hadde han 22 i redningsprosent mot Landins 40 i same periode.

Boxen-hallen var overfylt med nesten 15.000 tilskodarar, snautt 4000 av dei nordmenn. Bak det eine målet er det reist ein provisorisk ståtribune for å få inn fleire menneske i arenaen.

Duell med svenskane

Hovudrunden går med tre kampar for kvart lag frå laurdag til onsdag. Det endelege programmet er ikkje spikra av arrangøren, men dette ventar Noreg:

Sverige: Forsterka sidan sølvet i EM i fjor. Har truleg VMs beste og jamnaste keeperpar. Ein klar kandidat til å nå ein finale.

Ungarn: Eit stabilt og solid lag, men kjem sjeldan opp i ypparste verdsklasse.

Egypt: Solid mannskap med fysikk og ikkje sjeldan offensivt forsvar. Tapte med tre mål for Sverige og klarte uavgjort mot Ungarn i gruppespelet.

(©NPK)

Mikkel Hansen var ein gigant mot Noreg i handball-VM. Foto: Henning Bagger / NTB scanpix

Sander Sagosen (i kvitt) vart sett på benken i periodar av VM-kampen i handball mot Danmark torsdag. Foto: Lise Åserud / NTB scanpix