Modric før VM-kvartfinalen: – Vi skal vere oss sjølv
Luka Modric lèt seg ikkje skremme av eit Brasil i storform. Før kvartfinalen på ettermiddagen held han fast på at Kroatia skal vere seg sjølv.
Kroatia augnar moglegheitene for ein ny VM-finale, men for å komme dit må favoritt Brasil slåast i kvartfinalen. Før kampen innrømmer kaptein Luka Modric at kroatane er underdogs.
– Brasil er alltid favoritt. Vi veit at den største kampen så langt er den neste, sa Modric på pressekonferansen før kampen.
Brasil har så langt innfridd stempelet som favoritt og levert noko av den beste fotballen i VM i år. Spesielt åttedelsfinalen mot Sør-Korea, der dei leidde 4-0 til pause, bør vekkje frykt hos dei kroatiske motstandarane. Likevel veit Modric korleis Kroatia skal handtere det brasilianske stjernegalleriet.
– Vi skal vere oss sjølv. Vi har gjort noko fantastisk ved å komme til kvartfinalane, men vi vil gjerne nå endå lenger, sa ein offensiv Modric.
Brasils største stjerne, Neymar, har derimot ingen planar om å gjere jobben enkel for dei kroatiske herrane.
– Eg kjem til å gjere alt eg kan for å vinne med Brasil. Det er målet vårt og draumen vår, seier Neymar ifølgje AFP.
Vinnaren av kvartfinalen mellom Kroatia og Brasil møter Argentina eller Nederland til semifinale. Begge kampane blir avgjorde fredag.
(©NPK)
Modric trur Kroatia kan nå endå lenger i VM. Foto: Darko Bandic / AP Photo / NTB
