Molde sleit seg vidare igjen – dei store NM-overraskingane svikta

Ikkje før vel 80 minutt var spelte i Eidsvoll, kunne Molde puste letta ut. Kampen stod lenge og vippa på 2–1 til gjestene, men Rafik Zekhninis 3-1-skåring knuste omsider Eidsvold Turns draum om avansement til fjerde runde i NM.

Før slutt rakk Magnus Grødem å leggje på 4–1.

2.-divisjonslaget, som onsdag vart leidd av den tredje hovudtrenaren sin på ei veke, var venta å få det tøft mot dei blåkledde frå Molde. Storfavorittane lét berre sisteskanse Jacob Karlstrøm kvile av dei største profilane.

MFK tok leiinga ved Martin Linnes etter 27 minutt, og snautt ti minutt seinare fekk midtstoppar Benjamin Tiedeman ein gyllen moglegheit til å sende bortelaget to mål føre etter eit hjørnespark. Vertanes burvaktar ville det annleis, og kort tid etter fekk Eidsvold Turn moglegheita til å utlikne frå straffemerket.

I duell mot Molde-målvakt Oliver Petersen gjorde Ole Andreas Nesset ingen feil, og laga tok dermed pausepraten på stillinga 1–1.

Etter eit vedvarande trykk etter kvilen la innbytar Magnus Grødem på til 2–1 til Molde, medan Zekhnini og Grødem fjerna all tvil i sluttminutta.

Hektisk døgn

Sandefjord, som tysdag måtte ta den lange bussturen nordover til Trøndelag etter at NFF avslo søknaden om utsetjing, fekk ein god start borte mot Byåsen.

Drygt halvvegs ut i første omgang tok dei leiinga etter eit uheldig sjølvmål ved Sander Halgunset. Eit kvarter etter sidebytet utlikna Jonas Horten, før Mohamed Ofkir sende eliteserielaget tilbake i leiinga midtvegs i andre omgang. Sandefjord fekk med seg 2–1 frå Trondheim.

På Sotra var Haugesund på besøk i det som vart ein sjansefattig første omgang, og det skulle nesten ta ein time før gjestene fekk hol på byllen takka vere eit mål frå Martin Samuelsen. 0–1 vart sluttresultatet.

Serieleiaren vidare

Lillestrøm opna godt på Åråsen i møte med Aalesund, men serieleiaren sleit med å skape dei store moglegheitene mot eit kompakt bortelag.

Etter ein tett og jamn første omgang lykkast vertane like før laga gjekk til pause. Ungguten Eskil Edh fann spydspiss Hólmbert Fridjónsson på innsida av sekstenmeteren. Islendingen reagerte instinktivt og hamra ballen ned i Sten Grytebusts høgre hjørne.

Etter ein imponerande siger mot Strømsgodset i andre runde tok Gjøvik-lyn onsdag imot Stabæk i håp om å skape eit nytt cupmirakel. Draumen vart fort knust då gjestene tok leiinga ved Gift Emanuel Orban etter vel ti minutt spelte.

Divisjonsforskjellen vart etter kvart svært tydeleg, og bortelaget la på til både 2–0 og 3–0 før halvtimen var unnagjord. Etter ein time spelt sette Herman Geelmuyden inn Stabæks fjerde, medan Fitim Azemi sørgde for gjestenes femte berre få minutt seinare.

Før slutt rakk både Kaloyan Kostadinov og Azemi å leggje på til 6–0 og 7–0 til Stabæk.

Tøft for Moss

I Moss tok overraskingslaget frå andre runde imot Start. Dei store sjansane glimra med sitt fråvær lenge, men etter 36 minutt låg den første ballen i nóta denne kvelden. Eit strålande frispark frå Cameron Cresswell sørgde for at gjestene gjekk til pause med leiing.

Fem minutt etter kvilen var vertanes Kristian Strande uheldig då han sette ballen i eige nett, og sørgde med det for 2–0 til Start. Etter 59 minutt la Kristoffer Tønnessen på til 3-0, som også vart sluttresultatet på Melløs.

(©NPK)

Det blei til slutt Molde-jubel i cupen då Eidsvold Turn blei slått 4–1. Her frå ein tidlegare kamp. Foto: Trond R. Teigen / NTB