Nedgang på Oslo Børs
Nedgang for fleire av oljegigantane bidrog til at hovudindeksen på Oslo Børs fall med 0,53 prosent onsdag. Ved stengetid låg indeksen på 849,13 poeng.
Som vanleg var Equinor mest omsett, men mastodonten fekk merke den tunge dagen for oljeselskapa og fall med 1,4 prosent. Like bak på omsetningslista låg Aker BP, som måtte tole ein nedgang på 2,55 prosent. Også DNO, TGS og Subsea 7 fall i verdi med høvesvis 0,29, 1,55 og 0,76 prosent. Petroleum Geo-Services vart det einaste selskapet i oljesektoren som gjekk opp - aksjen steig med 2,6 prosent.
Etter fleire dagar på rad med raude tal kunne Norwegian notere ein oppgang på 2,37 prosent. Det skjedde same dagen som flyselskapet offentleggjorde passasjertala for januar, som viste ein passasjervekst på 13 prosent samanlikna med januar i fjor.
Yara International gjekk opp med 0,31 prosent, og DNB gjekk opp med 0,16 prosent. Både Norsk Hydro og Telenor fall med høvesvis 2,09 og 0,68 prosent.
Vinnaren på onsdag vart gassreiarlaget BW LPG, som steig med heile 7,54 prosent etter å ha vorte anbefalt i Finansavisen tidlegare på dagen, ifølgje Hegnar.no. Blant taparane var Orkla, som skuffa med ein nedgang på 2,85 prosent.
Også på dei tonegivande børsane ute i Europa gjekk det trått onsdag. DAX 30 i Frankfurt fall 0,39 prosent, mens FTSE 100 i London fall med 0,03 prosent. CAC 40 i Paris fall tilbake 0,08 prosent.
Ved stengetid kosta eit fat nordsjøolje 62,3 dollar på spotmarknaden, opp snaue 0,5 prosent gjennom dagen. Eit fat amerikansk lettolje gjekk onsdag ettermiddag for 53,9 dollar fatet, opp 0,2 prosent.
(©NPK)
Hovudindeksen på Oslo Børs fall onsdag med 0,53 prosent. Foto: Terje Pedersen / NTB scanpix
