Nedjusterer talet på døde og såra på Sri Lanka
Styresmaktene på Sri Lanka justerer ned talet på drepne etter terrorangrepa i påsken frå 359 til «om lag 253». Også talet på såra er kraftig justert.
Det opphavlege talet på 359 drepne kom av ein reknefeil, opplyser det srilankiske helsedepartementet torsdag.
Helsedirektør Anil Jayasinghe på Sri Lanka seier at talet no er om lag 253, men at det eksakte talet ikkje kan fastsetjast på grunn av dei omfattande skadane som fleire av dei drepne har.
Jayasinghe legg til at også talet på såra er nedjusterte frå opphavleg 485 til 149.
(©NPK)
Ei gravferd for terrorofre på Sri Lanka. Foto: AP / NTB scanpix
Det har vore mange massegravferder på Sri Lanka dei siste dagane. Torsdag nedjusterte styresmaktene talet på drepne med over 100 til 253. Foto: AP / NTB scanpix
